NILAS OLAS

Raos alus,kenyem manis sada ngasab,

Ngajak rerama,inget menyama pati sasab,

Nyakupang lima mimbuh ucap swastyastu sada sengab,

Nyatuang idep lakar ngidih nasi sada dabdab.

Ipyanak manggut manggut nyuksukang awak,

Nguntul lingker hormat bungkut kanti bawak,

Ngidih olas apang sida keterima yadyastun dadi biawak,

Dugas ento nyak saja ngibur dadi lawak.

Olas di keneh olas diucap,keterima ia sangkaning pedalem,

Baat munyin reramane,nyatuang tiwas,megae kanti selem,

Nanging sing sida ngangkidang idupe,setata idupne kelem,

Olas jero ngangkidang idup pyanak tiyang pang sing kelem.

Pastika selantang urip tiyang lakar inget,

Olas jerone ngidupang pyanak tiang pasti inget,

Suksma pang banget

Yening tiyang engsap dados sampun jero nyinget.

Suba mejalan amasa,uli keterima

Ia suba sing mesemu jelema

Mecapatan tusing taen,kalingke nyakupang lima,

Engsap teken munyine dugas nagih terima.

Saja ne jelema nilas olas

Olas iraga tusing kabalas

Uli sesana melah,nanging setata palas

Meh yan dadi pang setata lempas.

Tiyang Suksma yadyastun bikasne setata melengkas

Teken sesana dadi pegawe cara sing waras

Mesebeng aeng,wanen mekejang papas

Karma hidup pasti lakar numpas baan timpas, bikas ane buas.

 Medio 1 September 2024

Mapas bikas